Anpil machin Leta achte pa janm tounen nan pak otomobil yo. Yon seri ansyen fonksyonè ak ofisyèl deside kenbe machin Leta ki te nan men yo menm lè yo pa nan pòs la ankò. Genyen ki menm fè lòt papye ak plak pou machin yo yon fason pou yo kenbe yo nèt. Lapolis pral resevwa lòd pou mennen envestigasyon.
Sitiyasyon an sanble malouk. Anpil machin Leta te achte ap woule nan lari a epi pa janm retounen menm lè moun yo te mete l a dispozisyon l la pa nan pòs la ankò. Dapre yon sous byen enfòme, Gouvènmanan deside aji sou pwoblèm sa ki lakoz Leta oblije ap plede achte machin. Li fè konnen « OAVCT voye lis machin Leta achte depi lè Laurent Lamothe te Premye Minis bay gouvènman nan. Gen anpil nan yo ki pa janm retounen nan Pak otomobil yo ».
« Pami machin sa yo gen anpil ki blennde. Epi, se machin tou nèf moun sa yo deside kenbe a. Se yon bagay ki fèt souvan nan administrasyon piblik la. Gen moun ki menm douko yo epi fè lòt plak yon fason pou yo ka kenbe machin yo nèt » li te rapousib. Men twou manti pa fon. Lapolis pral resevwa lòd pou mennen envestigasyon sou moun sa yo yon fason pou Leta ka rekipere byen l epi lalwa aplike dapre sous nou an.
