Leta oblije ap plede achte machin akoz movèz fwa anpil ansyen fonksyonè ak ofisyèl. Moun sa yo pran abitid pa remèt machin Leta ki te nan men yo menm lè yo pa nan pòs la ankò. Gouvènman an ap pran dispozisyon pou repran tout machin li gen deyò.
Plizyè ane apre yo pa nan pòs yo ankò kèk ansyen ofisyèl ak fonksyonè Leta pa remèt machin ki te nan men yo a. Yon move abitid ki lakoz Leta oblijje ap plede depanse lajan pou achte machin. Pou kanpe move pratik sa ki gen gwo konsekans sou kès Leta ki pa menm gen anpil lajan pouvwa an plas la deside aji.
« Gen zanmi yon ansyen Prezidan ki gen 15 machin nan men l. Pami yo gen ki blennde. Plizyè dizèn machin ki te achte pou Palè a nan men zanmi menm ansyen Prezidan sa. Gen yon ansyen Premye Minis ki kite pòs la ak 4 machin nan men l, gen yon lòt ki gen 7, yo tout tou nèf epi blennde. Gen fonksyonè ki gen 2-3 machin nan men yo. Menm gen chofè ki kenbe machin Leta » te deklare yon responsab nan OAVCT ki gen lis machin Leta yo. « Menm lè sa difisil pou retrase tout paske gen moun ki refè papye machin yo epi plak yo gen dispozisyon ki ap pran pou rekipere machin sa yo » te rapousib fonksyonè a.
